Diversidade, interculturalidade, violación de dereitos humanos, destrución da natureza…, diferentes perspectivas dunha proposta que consideramos do maior interese.
Son moitos os pobos indíxenas e minoritarios repartidos ao longo do mundo, son moitos os costumes e tradicións que perviven grazas a eles, son moitas as linguas que se falan e poden estar en risco de desaparición, como tamén algúns destes pobos. Paga a pena que, desde a biblioteca, plantexemos un tema que invite á reflexión e acheguemos ao alumnado a unhas culturas tan minoritarias como enriquecedoras.
O simple feito de coñecelas e visibilizalas axudará a rescatalas do esquecemento. Se compartimos a loita pola súa terra e polos seus dereitos, poderemos defendelas.
O noso lema “Coñéceas, Visibilízaas, Deféndeas” resume este proxecto e posibilita novas vías de exploración.
