A metodoloxía utilizada para desenvolver o proxecto documental integrado debe ser activa, participativa e interdisciplinar.
1. Metodoloxía activa. O alumnado deixa de ser un mero receptor de contidos para se converter no motor da súa propia aprendizaxe, fortalecendo a autoconfianza. A alfabetización informacional pasa a ser, entón, un dos obxectivos principais para que o desenvolvemento da investigación se realice con éxito. Tamén, a alfabetización múltiple lle permitirá ao alumnado manexar a información en distintos soportes e chegar a comprender variados tipos de textos.
2. Metodoloxía participativa. O traballo colaborativo axudará ao alumnado a esforzarse para aportar a súa visión dos coñecimentos adquiridos ao grupo, a expor as súas ideas, a defender a súa postura e a respectar e aceptar as opinións dos demais compañeiros e compañeiras. Foméntase, ao mesmo tempo, a reflexión e o espírito crítico e favorécese a inclusión e a socialización.
3. Metodoloxía interdisciplinar. O proxecto coordinado pola biblioteca deberá desenvolverse nos diferentes departamentos didácticos, vinculándoa aos contidos curriculares. O tratamento dun único tema con distintos enfoques aportará ao alumnado unha visión global do tema proposto.
Esta metodoloxía debe resultar motivadora e desenvolver, entre outras, a competencia aprender a aprender.